Calandreta los braç alandats
Las escòlas immersivas en occitan deu Bearn qu'orbiràn las lors pòrtas deu 23 dinc au 28 de març...
 

En 1979, qu’estó aviada la purmèra escòla Calandreta a Pau dab cinc mainats en los prefabrictas de l’escòla de l’ipodròme de Pau, ara desapareishuda. Uei, Calandreta qu’ei 60 escòlas, tres collègis (Montpelhièr, Pau e Tolosa), mei de 3400 eslhèves shens comptar los regents e milierats d’associatius qui s’i hèn tot dia a pala virada tà har víver las escòlas aqueras, laïcas e a gratis.

Pr’amor ne’s cau pas desbrombar las calandretas que son escòlas associativas, geridas peus pairs e mairs d’eslhèves e quitaments si receben lo mei sovent (lo mei ne vòu pas díser tostemps…) subvencions o ajudas municipaus, quitaments si los regents e son pagats peu Ministèri de l’Educacion Nacionau, que cau enqüèra trobar quate sòus (sic !) tà çò d’aut : pagar tot lo personau d’enquadrament, lo materiau pedagogic, l’agergada de las classas, las còstas de foncionament…

Los curiós qui’n volhin saber mei que seràn servits tà l'auta setmana. En efèit, deu 23 dinc au 28 de març, las Calandretas deu Bearn (nau escòlas e un collègi) qu’orbiràn las lors pòrtas au public qui averà l’opportunitat de viéner en classa descobrir aqueras escòlas on s’i practica l’immersion lingüistica en occitan dab la pedagogia Freinet aperada « activa ».

Tot lo programa d’aqueras pòrtas alandadas de Calandreta en clicar aci o en anar suu site internet de la Federacion Departamentau de las Calandretas de Pirenèus-Atlantics : www.calandreta-bearn.org