Calandreta dejà a hum
Lutzada sus las purmèras animacions de l'annada 2015 tà las escòlas calandretas bearnesas...
 

Tot au long de l’annada, las escòlas Calandretas que hèn animacions de tot escantilh qui permeten de finançar e d’ajudar au desvolopament e de har víver tot simplament las escòlas.
En aqueth debut d’annada, quauques-uas deu Bearn que seràn suu pont per aquestas setmanas.

Purmèr, aqueste divés 16 de genèr, l’associacion Òc per Tots qu’organiza ua cantèra au Cafè deu Heralh a Artics, a comptar de 20h30. Pairs, calandrons e amators de cantas tradicionaus que poderàn balhar drin de votz au costat deus cantaires de Cescau e deu grop Lambrusquèra.

Deu costat d’Auloron, la calandreta qu’organiza lo son eveniment màger, la Corruda. La setau edicion, corruda e marcha sus 10 km, que’s debanarà lo dimenge 25 de genèr, a partir de 10h. Los beneficis d’aqueth eveniment que van tà l’escòla e qu’ajudan a finançar las despensas administrativas (loguèr, personau d’enquadrament…) de l’associacion qui gavida la calandreta.
L’escaduda de la Corruda, aviada en 2009, que’s confirma annada après annada dab augan, mei de 350 participants prevists.

Costat practic, començar de la corruda a 10h e marcha a 10h15.
Retrèit deus pedacets a partir de 7h30. Inscripcions de 10 € dinc au divés 23 de genèr e 12 €, lo dia de la corruda.