Bal a casa
Suu principi de l’aubèrga espanhòu, l’associacion "Là-bas" qu’organiza un bal a casa a La Seuva...
 

L’associacion "Là-bas", mercés a l’arcuelh d’Anne e Antoine e a l’ajuda deus Seuvetons, qu’organiza un bal a casa aqueste dissabte lo 8 d’aost, camin de Mourtérou a La Seuva.
Suu principi de l’aubèrga espanhòu, cadun que vien dab la soa cadièra plegadissa, un dequé tà minjar o béver un còp e la soa gaièra. Lo principi qu’ei simple, que tiram los mòbles, qu’envadim lo casau entà cantar, dançar, minjar, béver e arríder.

Aqueth bal a casa que serà lo parat de descobrir un programa simpatic, variat e navèras formacions de bal e cant tradicionau gascon mes tanben de Bretanha :

17H30 : Jacqueish Roth e Companhia (Béarn) puish cantèra
19H : Lab’Òc (Gasconha) puish cantèra
20H30 : Hirnez (Bretanha)
22H : Maishant Temps (Gasconha)
23H : Cantèra e empont ubèrt, cadun que’s harà seguir lo son instrument

Entà ajudar l’organizacion, los qui serén interessats per aquera serada que son pregats de s’inscríver purmèr (quan la vòsta vienguda ne serà pas segura) en clicar suu ligam doodle aqueste : http://doodle.com/kubd5bkzeqk2xrka

Que s’i cau avisar, l’entrada e la sortida deu Camin de Mourtérou (dens un cutorn sarrat deu camin Gant-La Seuva) que pòden estar drin delicatas donc prudéncia.
Que serà signalat dab panèus entà’u trobar adaise.

Mei d’entersenhas sus aquera serada : 05.59.21.78.45 / jolecopeau@gmail.com o michael.tempette@gmail.com