Aush capitala de Gasconha
Aush qu’arcuelha la purmèra edicion deu hestau « De Còr e d’Aush » los 25, 26 e 27 de seteme de 2015...
 

De bals en concèrts, d’estagis en contes, de filmes en conferéncias, de cantèras en libes, de passacarrèra en comentaris de copa deu monde, de ràdio en television… Aush qu’arcuelh la purmèra edicion deu hestau « De Còr e d’Aush » los 25, 26 e 27 de seteme de 2015.

L’IEO 32, organizator deu hestau, que harà descobrir pendent tres dias la diversitat, l’originalitat, lo riquèr e la vitalitat de las creacions artisticas e culturaus actuaus a l’entorn de lenga e de la cultura occitanas.
Un programa deus cargats e un sarròt d’animacions qu’aucuparàn mantuns locs emblematics de la vila : descobèrta de las edicions occitanas, passacarrèra per las carrèras deu mercat, lo Musèu deus Jacobins que prepausarà mantuas animacions, bals au còr de vila o au Dòme de Gasconha, concèrts, estagis de cants e de danças…

Los mèdias occitans que seràn tanben presents suu hestau. La bibliotèca d’Aush que serà transformada en sala d’enregistraments d’emissions literaris d’Òc Tele e Ràdio País qu’apitarà lo son estudio au còr de vila entaus sons dirèctes de la dimenjada.

Entà non pas mancar arren de la programacion deu hestau, pr’amor que i a de qué har !, que v’invitam a léger lo programa sancèr de « De Còr e d’Aush ».

Taus qui serén interessats peus estagis, que’vs podetz inscríver en linha suu site internet deu hestau : www.decoredaush.fr