Aumenatge a Simin Palay
Quan l'arrèr-arrèrhilha de Simin Palay hica en musica poèmas e tèxtes deu son ajòu...
 

Que’ns caleré mei qu’un article tà díser e presentar la vita, e sustot l’òbra, de Simin Palay e l’eretatge qu’a deishat tà la lenga e la cultura gascona.

Autor de pèças de teatre, de poesias, d’obratges sus las cantas de noste o enqüèra sus la cosina deu Bearn, co-fondator dab lo son amic de tostemps Miquèu Camelat de L’Escòla Gaston Febus e de la revista Reclams… La soa òbra màger qu’ei solide lo son Diccionari deu bearnés e deu gascon modèrnes, un tribalh gigant qui demora uei un apèr de referéncia taus aimadors de la lenga nosta.

Un aumenatge estonant que’u serà rendut lo 23 d’octobre a Laruns e lo 25 d’octobre en lo son vilatge de vaduda, Castèida-Doat. Patricia Heiniger-Casteret, antropològa e ensenhaire a l’Universitat de Pau e deu País de l’Ador, que contarà las granas etapas de la vita de Simin Palay qui seràn illustrats en musica.

Anne-Marie Palay qu’a hicat en musica poèmas deu son ajòu e que jogarà aqueras particions dab l’ensemble Estela, qui amassa musicaires deu Conservatòri e de l’Orquèstra de Pau. Aqueth aumenatge qu’ei vertadèrament un ahar de familha pr’amor Anne-Marie ne serà pas la sola a hà’s-i dab lo son instrument. Que sera acompanhada deu son hrair Michel, e d’Aurélie e Jean-Philippe Fauthous-Palay, tot dus, arrèr-arrèr-arrèrhilhs de Simin Palay !
Aquestas conferéncias musicaus que’s debanaràn donc lo dijaus 23 d’octobre, a 20h, a la mediatèca de Laruns e lo dissabte 25 d’octobre, a 20h, organizat peus Amics deu Castèth de Montaner a la sala de las hèstas de Castèida-Doat. Acerà, la conferéncia que serà seguida d’un bal gascon.

Entresenhas mei : 05 59 40 57 66 (Médiatèca Laruns) e 05 59 81 53 88 (Amics deu castèth de Montaner)

Si'n voletz saber mei sus aqueth gran mossur, que podetz anar véder la video de la conferéncia balhada per Patricia Heiniger-Casteret en clicar aci.