Arraya que s’i hè au handbal
Despuish mei de 60 ans, lo club de handbal de Pau-Nostin qu’anima la vita deu vilatge e au-delà de las soas termièras. Que'n daràn enqüèra la pròva lo 8 d'ocotbre dab un concèrt deu grop Arraya...
 

Despuish mei de 60 ans, lo club de handbal de Pau-Nostin qu’anima la vita deu vilatge e au-delà de las soas termièras. Dab un budget deus petits, l’equipa fanion que s’i escad a demorar un deus actors màgers de la Nacionala 1, sia lo tresau nivèu nacionau.
En mei de las qualitats esportivas, lo monde deu handbal qu’arreconeish au club un estat d’esperit deus bons e un sens de l’arcuelh incomparable, çò qui hè la soa reputacion au-delà deu noste Bearn.
Augan, la restructuracion d’aquesta Nacionala 1 de cap tà mei de professionalisme, donc d’asseguranças financèras, qu’encoratja lo Pau-Nostin Espòrts a anar cercar mei de moneda tà tiéner lo desfís de demorar a un nivèu on davanteja d’un biaish esportiu. Entad aquò har, que van de segur apressà’s de navèths aliats, mes tanben crear mei d’animacions a l’entorn de las partidas e deu club com ac van har lo dissabte 8 d’octobre qui vien.
Los salièrs d’Arraya que vieneràn semiar la lor gaujor costumèra e las lors votz poderosas a comptar de 21h a la sala de Nostin.
Que podetz reservar las vòstas plaças Café des Sports Nostin (09 80 65 09 66) mes tanben a l’Ostau Bearnés au 05 59 30 60 34 o contact@ostaubearnes.fr
Pre-venta : 10€ / Tarifa sus plaça : 12€
Miei-tarifa taus - de 16 ans e a gratis taus -12 ans