Arraya qu'ataca la sason
Los cantaires de Salias que's preparan a ua fin d'annada de las peludas...
 

Dissabte qui vien, Arraya que serà deu costat de la glèisa de Saut, suu còp de 20h30, a l’envit deus Comelodians entà balhar un concèrt de qui a lo secret, mesclanha de votz poderosas, de tendressa e de plaséncia. Aqueth espectacle que serà lo còp d’aviada d’ua fin d’annada de las peludas entaus cantaires de Salias.

En mei deu concèrt de Saut, los d’Arraya que seràn sus l’empont deu Tremplin de las Polifonias de Laàs au mes de mai, que’us trobaram tanben deu costat de Bonnut, Nai o enqüèra Morlaàs… mes lo rendetz-ve qui non calerà pas mancar qu’ei lo deu dissabte 11 de julhet a Salias.

Los collègas deu president Serge Hourdebaigt que s’an dat enqüèra un desfís en organizar un navèth espectacle d’endom a l’estadi Al Cartero, dejà utilizat com empont en 2006. Augan, que s’i tornan en companhia de l’Armonia qui serà partida integranta deu concèrt sus un detzenat de tròç e com non hèn pas jamei com los autes, l’empont que serà apitat en las tribunas quan lo public e prenerà plaça suu prat (mei de 2000 plaças previstas). Un còp mei, Arraya que hicarà las cartaulas dab un dispositiu video e sonòr de purmèra entà profieitar au miélher deu concèrt, shens desbrombar un petit espaci de restauracion e un gran estanquet, indissociable de la vita d’aqueth grop…

Que’n tornaram parlar d’ací quauques setmanas, sustot que l’actualitat d’Arraya ne s'estanga pas aquí. En efèit, lo grop qu’acaba tot dòi las presas de son d’un navèth CD. Los cantaires qu’espèran prepausar lo lor navèth disc au parat deu concèrt deu 11 de julhet mes que‘n demora enqüèra tribalh entà finalizar lo mesclatge de las 14 cançons, entà la màger part en occitan mes tanben castelhan e basco, a l’imatge d’Arraya, sharnègo tot menat. Un ahar a seguir !

Entresenhas mei suu grop : www.arraya-salies.com