Ajudatz a la modernizacion deu Musèu de la Sau
L'associacion deus Amics deu Vielh Salias, sòcia de l'Ostau Bearnés, que mia lo projècte de modernizar lo Musèu de la Sau e de las tradicions bearnesas...
 

L'associacion deus Amics deu Vielh Salias, sòcia de l'Ostau Bearnés, que mia lo projècte de modernizar lo Musèu de la Sau e de las tradicions bearnesas. Situat en lo còr istoric de la vila de Salias, qu'a aviat despuish 2013 un programa de renovacion ambiciós. L'objectiu qu'ei de balhar au musèu ua navèra joenessa, entà har vàler las importantas colleccions e estar enqüèra mei atractiu aus uelhs deu public.

Ua purmèra escaduda : lo baish qu'ei ubèrt au public. La galeria deu temps que pòrta tà la lutz las colleccions arqueologicas. Un damièr de veire e de husta au dessús deu "dulî" (sèrva enterrada d'aiga salada), e ua video de la cheminèia que permet d'avalorar lo talhèr de faiçonatge. L’istòria deus Part-prenents qu'ei explicada per un arbo genealogic, veirinas intimistas e ua animacion en 3D qu'ei projectada sus la maqueta deu còr de vila realizada per benevòles. Dab l’aperet aus dons de genèr 2015, qu'an amassat 75 000 €. 

Damier et dulî

La Sala de la Muda que serà lèu renovada tanben e que serà consacréada a las mustras temporàrias e au talhèrs pedagogics. Que permeterà la mesa a las nòrmas de l’arcuelh tà las personas a mobilitat redusida. La màger part de las òbras de la Sala de la Muda que seràn presas en carga per la municipalitat qui ei proprietària deus lòcs. 

Doncas que s'i tornan uei dab un navèth desfís : contunhar la modernizacion deus solèrs. Lo purmèr solèr que serà consacrat au XIXe sègle, lo navèth quartièr termau, las salinas e la vita mondana en las ostalerias de luxe, lo borg ancian dab los mestièrs de bèth temps a e la vita vitanta. Lo dusau que portarà tà la lutz lo riquèr de la colleccion geologica en un ambient scientific e ludic. Lo còst de las òbras deu purmèr solèr que son de 74 000 € e qu'an besonh lo sostien de tots tà amassar 10 000€. 

Que podetz har un don dab un finançament participatiu ací

E tà'n saber mei suu musèu e l'associacion deus Amics deu Vielh Salias : www.museedusel64.com