10 ans de bons e leiaus servicis !
Lo Collectiu Ça-i que hesteja 10 ans au servici de la cultura nosta, de la creacion artistica e sustot de la lor difusion...
 

Qu'èra ger, l'aniversari deu Collectiu Ça-i. Vadut lo 18 de noveme 2005, que hestejava atau los sons 10 ans... Detz ans au servici de la cultura nosta, de la creacion artistica e sustot de la lor difusion.

Despuish 2009, l'associacion qu'ei Pòle Ressorça deu Conselh Departamentau deus Pirenèus Atlantics suu Patrimòni Culturau Immateriau e l'Espectacle Viu.   
Los sons prètzhèits que son crear ua navèra fòrma de regropament artistic, lutar contra l'uniformizacion e desvolopar ua auta fòrma de partatge : la transversalitat.
Lo Collectiu Ça-I, qu'ei doncas : ua expertisa, acompanhament de projèctes, mediacion culturau, un bohaire d'ideas, un aliat e tant d'autas causas enqüèra...

Lo Trebuquet, Arremudis, Minimatges e contòts, Jan de l'ors, "Songe d'une nuit irradiée", "Les Épopées du Béarn", A Pau qu’ei, Aci e Adara, Alandar, « La Fête du Bois », las jornadas deu Patrimòni... A còp segur, qu'avem tots un beròi sovier dab lo Collectiu.

E tà'ns brembar, que'ns hè un petit present : ua video de quauques moments d'aquèras detz darrèras annadas.

E taus qui'n volerén enqüèra mei, que poderatz anar deu costat de :

- Arudi, uei lo dijaus 19 de noveme au ser a 9ò : Velhada cantada dab Thomas Baudoin, Pascal Caumont e Maider Bedaxagar tà ua justa aliada a las musicas improvisadas aus accents bascos/mediterranèus/gascons/alandarais...

-  A l'Esat de Diussa lo divés 20 de noveme a 8ò lo ser  : contes de Daniel Cabarry e Thomas Baudoin en l'encastre de la politica deu Conselh Departamentau deus Pirenèus Atlantics auprès deus sons publics prioritaris.

- A Anoja, lo dissabte 28 de noveme lo vrèspe a 5ò30 : contes en musica de Thomas Baudoin.

Que desiram au Collectiu Ça-I un bon aniversari e longas e beròjas annadas de creacions artisticas, d'encontres enriquidors e de projèctes estrambordants.

www.ca-i.org/fr